Hyfforddeiaethau Adfer Natur a Newid Hinsawdd

Mae hyfforddeion yn treulio mwyafrif eu hamser mewn gweithgareddau galwedigaethol perthnasol, sy’n rhoi profiad arwyddocaol iddyn nhw y gallan nhw ei nodi ar eu CV i’w ddefnyddio wrth ymgeisio am swyddi ar ddiwedd eu Hyfforddeiaeth.

Mae’r cymysgedd o weithgareddau’n amrywio, gan ddibynnu ar y tîm sy’n lletya’r Hyfforddai.

Bydd y profiad a enillir yn berthnasol i natur a lleoliad pob hyfforddeiaeth a gallai gynnwys:

• rheoli cynefinoedd
• defnyddio offerynnau a’u cynnal a’u cadw
• adnabod rhywogaethau
• rheoli gwirfoddolwyr
• trefnu digwyddiadau
• trefnu cymunedol
• datblygu a chyflawni ymgyrchoedd
• creu gwefannau a chynnwys ar gyfer y cyfryngau cymdeithasol
• iechyd a diogelwch

Yn ogystal â’r sgiliau hanfodol sy’n cael eu hennill trwy weithgareddau galwedigaethol, mae’r cynllun Hyfforddeion yn datblygu sgiliau trwy hyfforddiant. Mae yna raglen o hyfforddiant craidd, gyda modiwlau perthnasol ar gael i Hyfforddeion. Bydd mentor yn cefnogi’r Hyfforddeion trwy gyfarfodydd un-i-un rheolaidd i osod amcanion sy’n berthnasol i gynllun datblygu’r Hyfforddai, adolygu cynnydd â’r amcanion hyn a’u diweddaru.

Cynhelir mwyafrif yr hyfforddiant craidd yn fewnol, gan bobl sy’n arbenigo yn y pwnc dan sylw, sef aelodau o staff fel rheol. Mae’r rhaglen yn cynnwys nifer o gyrsiau undydd, y mae gweithgareddau yn y gwaith yn eu cadarnhau i atgyfnerthu’r hyn sy’n cael ei ddysgu a rhoi profiad go iawn i hyfforddeion.

Bydd pob hyfforddai yn cymryd rhan mewn Cyflwyniad i Ymddiriedolaeth Natur Sir Faesyfed, a hyfforddiant mewn Sgiliau Cyfweld ac Ymgeisio.  Ar ben hyn, mae yna hyfforddiant perthnasol dewisol ychwanegol ar gael. Ymhlith yr enghreifftiau o fodiwlau dewisol sydd ar gael mae:

Cynllunio Gwaith Rheoli Gwarchodfeydd

Pori er Cadwraeth

Rheoli Da Byw ar Warchodfeydd

Cyhoeddusrwydd a’r Cyfryngau Cymdeithasol

Ymgyrchoedd

Trefnu Cymunedol

Diogelwch ar y Safle

Gweithdy Offerynnau

Arwain Grwpiau Ymarferol (Gwirfoddolwyr)

Arwain Taith Gerdded Dywysedig neu ddigwyddiad

Ar ddechrau’r Hyfforddeiaeth, bydd pob Hyfforddai’n cyfarfod â’i fentor/ ei mentor i gytuno ar amcanion, yn unol â chynllun datblygu’r Hyfforddai.  Mae’r broses hon yn rhoi’r cyfle i Hyfforddeion osod amcanion perthnasol ar gyfer eu Hyfforddeiaeth tan y diwedd. Caiff y rhain eu hadolygu a’u diweddaru’n rheolaidd yn ystod cyfarfodydd un-i-un â’u mentor.

Yn ogystal â’r cyfleoedd hyfforddi ac ennill profiad uchod, â’r nod o gynorthwyo Hyfforddeion i ddod yn rhan o’r gweithlu cadwraeth, mae’r Ymddiriedolaeth yn darparu hyfforddiant perthnasol sydd wedi’i ardystio’n genedlaethol i Hyfforddeion ac yn gwneud iawn am rai treuliau teithio.

Mae’r swydd hon yn un wirfoddol; fodd bynnag, fe fyddwch chi’n derbyn hyfforddiant, treuliau teithio a £200 i dalu am gyrsiau hyfforddi achrededig, diolch i Gronfa Gymunedol y Loteri Genedlaethol.

Dylai ymgeiswyr fod â diddordeb brwd mewn cadwraeth bywyd gwyllt yn y DU, bod yn eithaf ffit a bod yn barod i oruchwylio ac arwain gwirfoddolwyr.

Dylai ymgeiswyr fod rhwng 18 a 24 oed ar ddechrau’r hyfforddeiaeth.

Mae’n hanfodol ymrwymo i ddeuddydd yr wythnos am chwe mis.