Ymweliadwch Gilfach

Mae Gilfach yn lle arbennig – hen fferm ucheldirol mewn tirwedd ysblennydd sy’n llawn bywyd gwyllt a hanes, rhyw ychydig i’r gogledd o Raeadr Gwy yng Nghanolbarth Cymru. Mae croeso i ymwelwyr ddod i’r warchodfa natur hyfryd hon gydol y flwyddyn. Mae’r mynediad am ddim ond byddai hi’n dda pe baech chi’n gadael rhodd i Ymddiriedolaeth Natur Sir Faesyfed, i helpu â chostau cynnal a chadw.

Mae Gilfach yn cynnig rhywbeth arbennig gydol y flwyddyn.

Ar ddiwrnodau iach, braf o aeaf, mae’r coed yn gennau i gyd; yn y gwanwyn mae’r coetiroedd yn llawn cân yr adar gyda chân y gog i’w chlywed trwy’r dyffryn; yn yr haf mae lliwiau’r eithin a’r grug i’w gweld ar lethrau’r bryniau ac mae’r dolydd yn hymian; ac yn yr hydref mae ffyngau lliwgar i’w gweld yma ac acw yn y caeau, mae’r afon yn rhuo dros y rhaeadr – ac mae’n eithaf posibl y byddwch chi’n gweld yr eog yn llamu.

Tro trwy amser

Gallwch chi synhwyro treftadaeth Gilfach wrth ichi gerdded trwy’r warchodfa natur. Byddwch chi’n cerdded heibio i garnedd gladdu o’r oes efydd, yn sylwi ar weddillion hen reilffordd Canolbarth Cymru, yn gweld y tŷ hir o’r unfed ganrif ar bymtheg, ac yn cerdded yn ôl troed sawl cenhedlaeth o ffermwyr.

Ymweld â Gilfach

Mae’r prif faes parcio oddi ar ffordd yr A470 ger y Caban Croeso (Pont Marteg). Mae yna rwydwaith o deithiau cerdded â chyfeirbwyntiau i’ch helpu i fforio’r dyffryn, felly dewch â’ch esgidiau cerdded i’ch canlyn. Mae’r llwybrau’n gallu bod yn llithrig ac yn fwdlyd mewn tywydd gwlyb, felly mae’n bosibl y bydd ffon gerdded hefyd yn ddefnyddiol. Mae angen cadw pob ci ar dennyn, os gwelwch yn dda.

Mae mwy o gyfleusterau i ymwelwyr i’w cael yn Hen Fuarth y Fferm, gan gynnwys paneli gwybodaeth, lluniaeth i helpu’ch hunan iddo a thoiledau. I’r rheiny sy’n methu â symud yn dda, mae yna hefyd doiled hygyrch a llwybr hwylus byr.

Nid oes yna lawer o fannau parcio yn Hen Fuarth y Fferm ac mae’r ffordd i fyny’n gul sy’n golygu nad yw’n addas ar gyfer cartrefi modur.

Rhagor o wybodaeth

Mae gwybodaeth amrywiol ar gael i’w lawrlwytho o waelod y dudalen we hon, gan gynnwys map llwybrau y gallwch chi ei argraffu. Mae ffilmiau ar gael i’w gwylio am warchodfa Gilfach ar sianel YouTube Ymddiriedolaeth Natur Sir Faesyfed, gan gynnwys croeso cynnes i warchodfa Gilfach gan y cyflwynydd bywyd gwyllt, Iolo Williams.

Os hoffech chi ymweld gyda grŵp, yna cysylltwch â’r swyddfa ar 01597 823298 i gael help i drefnu pethau.
 

Downloads